SAITUAL-AH RIGHT TO INFORMATION(RTI)WEEK 2024 PUALA HUN HMAN A NI
Dated Saitual the 10th Oct 2024 : Vawiin khan DC Conference Hall-ah Right to information(RTI) 2024 week puala hun hman a ni a, he hunah hian District Bawrhsap Dr Lalngura Tlau chu khuallian niin hun a hman pui a, Pi F Zodingpuii,DIPRO, Saitual chu resource person a ni.
Khuallian Dr Lalngura Tlau chuan kalkhawmte hnenah thu sawiin RTI Act chu Public Interest, mipuite leh sawrkar hnathawkte tana dan tha tak anih laiin midangte kerna leh self interest atan hman a ni thin chu pawi a tih thu a sawi a. RTI dan chu mipuite chuan a tha zawng a hmang turte, langtlang taka hna an thawh theih nana hmang tangkai lehzual turte, mipuite’n sawrkar hna thawh dan te hriat chian nana hmang turin te in a chah a, chu chu ram thatna tur a ni a ti bawk. Mitinte inseh tawn zawng nilova a inchawi nung tawn zawnga RTI dan chu hmang turin kalkhawmte a chah a ni. Khuallian chuan kalkhawmte hnenah sawrkar scheme thar awm apiang inhrilhfiahnate nei tam tur leh social media, print media etc. te hmang tangkai leh zual turin a chah a, Department tina SAPIO, SPIO leh DAA te an mawhphurhna theuh hre nawn leh turin a chah nghal bawk a ni.
Resource Person Pi F. Zodingpuii, DIPRO chuan RTI Act 2005 chungchang sawifiahna leh sawi zauna hun hmangin, RTI hman dan turte, a tangkainate, appeal dan kawngte leh SAPIO, SPIO leh DAA te mawhphurhnate a tarlang a ni.
Vawiin programme hi Pu Lallawmawma,Addl DC leh CALA ni bawk chuan a kaihruaia a, Dr Lalngura Tlau, DC chuan thusawiin Pi F Zodingpuii, DIPRO chuan RTI chungchang sawizauna a nei bawk. He hunah hian Sawrkar Department hrang hrang aiawh, Saituala SAPIO, SPIO, DAA te leh tlawmngaipawl aiawhte te an tel tha hle.
