Dated : Saitual, the 12th March 2024
Vawiin, Dt. 12th March 2024 10:3 AM khan District Skill Development Committee, Saitual District huaihawtin Mizoram puma a vawi 1 na atan Pu Benjamin Vanlalnghaka, Physiotherapist, Saitual chu Singapore a hna zawm turin thlahliamna hun hman a ni.
He hunah hian DC Dr. Lalngura Tlau chu Chairman niin, Pu Jervis Lalramnghaka Chhakchhuak, Business Head, Jay Jay Solution, Aizawl te, Pu Benjamin Vanlalnghaka, Phisiotherapist, Saitualte, leh NGO hrang hrang aiawh te bakah District Skill Development Committee aṭangin line department hrang hrang aiawhte an tel kim ṭha hle.
Chairman chuan kalkhawmte hnenah thusawiin District Skill Committee tan chuan bungthar kaina lawmawm tak a nih thu sawiin thalai tamzawkten tun kum 2024 leh 2025 chhung hian Singapore mai nilo, Taiwan-ah te, Japan-ah te, Poland leh Turkey lamahte pawh tam zawk inthawn chhuak thei tura nasa zawka hmalak a phurawm thu sawiin hemi kawnga hmalatu rintlak tak mai Union Ministry hnuaia permit neia ṭhalai te tana hna zawn sak thei Jay Jay Solution a awm te hi lawmawm a tih tuh thu a sawi a.
Tin, Pu Benjamina chu midangte tan pawha entawn tlak ni turin a chah a, hei hian chhungkaw tam tak tan kawng a sialsak tur thu leh hmasawnna rahbi thar kailawn pawimawh tak mai kan district in kan kai chu mimal tak pawha a lawm takzet thu a sawi a ni.
He hunah hian Pu Jervis Lalramnghaka Chhakchhuak, Jay Jay Solution pawhin thu sawiin Saitual tlangval hetianga ram danga sawrkar hriatpuina ngeia kan han thlahliam tur hi lawmawm a tih thu sawiin agency rintlak leh buaina an tawh loh nan bul ṭan atanga felfai taka thil tih ṭhin hi a tul thu a sawi a, ṭhenkhat chuan mi hriat an hlauh avanga a ruka an kal ṭhinte, buaina leh harsatna an tawh hnua chinfel leh a buaithlak tawh ṭhin thu a sawi bawk.
He hunah hian member secy Pi Christina Lalrinfeli, SDC chuan District Skill Development Committee aṭanga puihna sum an dah 1.2 lakh chu 5% interest-in, kum 1 chhung atan puk turin inremna a sign pui bawk a ni. Member secretary, SDC ni bawk chuan Pilot project anih avangin Pu Benjamina chu a kutah hian an innghah thuk ziate, Progress report te a ṭul anga pek ṭhin a ngaih tur thute sawiin duhsakna sang ber a hlan nghal bawk.
Pu Banjamina hi a pa Pu RK Zoramchhuana, Saitual chuan a ṭawiawm a, sawrkar hriatpuina ngeia foreign-ah te hnathawk tura bultanna sum an ngaihtuahsak thei hi lawmawm a tih thu sawiin, State dangahte leh foreign-ah te hna thawh tur a tam em em a, chutih rualin Bachelor/Master degree nei ngei turin a ṭhalaipuite a chah a, eng hna pawh thawk se, dinhmun sang zawk a inhlangkai tur chuan thiamna sang zawk nei thei tura zirnaah theihtawp chhuah hram hram turte, mahni in lum kalsana hrehawm tawrh chak angai thu te a sawichhuak a ni.
